电梯检测不能全指望专家组

呢排睇有关电梯嘅新闻，睇到心慌慌，出咗事死咗人唔单止，仲要连大家一直都以为系“安全保证”嘅电梯年检，原来都好似系“心理安慰”。

　　嗱，呢句话唔系我老作噶，昨日“质监局回应电梯年检走过场”呢个新闻就有写，广州市特种机电设备检测研究院副院长武星军都话，年检只系为咗“俾信心”啲人去坐电梯，唔系对电梯安全打包票啊!

　　本来大家都好在乎电梯年检到底点检法。先唔理系咪“走过场”，半日检测22部电梯，效率又真系“高”到得人惊。质监局嘅回应虽然俾市民食咗粒定心丸，但系年检嘅过程到底系点样，检测人员工作时有无照足要求来做等等问题，就连个明确嘅答案都讲唔出。就算今次呢22部电梯由专家组重新检查过证实无问题，但系广州市几万部电梯，又有几多部有咁好彩，下下都有个专家组去复检返呢?

　　不过，好彩有武副院长呢番“大实话”，年检过关作为普通市民判断电梯安全与否嘅唯一标志，都唔一定系“坚嘢”，我哋仲边敢乱咁坐电梯啊。话时话，不如以后电梯换成个吊篮咯，结构简单，安唔安全又一目了然，坐果个都唔使咁啰啰挛啦!